नरेंद्र मोदी न आल्याने दु:खी झालो

Posted by वृत्तभारती Wednesday, March 18th, 2015

=मालदीवची प्रतिक्रिया=
नवी दिल्ली, [१७ मार्च] – गेल्या आठवड्यात तीन देशांचा दौरा करणारे पंतप्रधान नरेंद्र मोदी यांनी मालदीवला भेट दिली नाही, याचे आम्हाला फार जास्त दु:ख आहे, अशी प्रतिक़्रिया या देशाने व्यक्त केली. माजी राष्ट्राध्यक्ष मोहम्मद नाशीद यांना कारावास ठोठावण्याच्या घडामोडीवर भारताने व्यक्त केलेल्या चिंतेचे निराकरण करण्याचा प्रयत्नही मालदीवने केला.
नाशीद यांना दहशतवादविरोधी न्यायालयाने १३ वर्षांच्या कारावासाची शिक्षा ठोठावल्यानंतर भारतासह अनेक देशांनी चिंता व्यक्त केली. याबाबत विचारणा केली असता मालदीवच्या परराष्ट्र व्यवहार खात्याच्या उपमंत्री फातिमा इनाया म्हणाल्या की, जे काही झाले, ते कायद्याच्या चौकटीतच झाले आणि ही बाब शुद्ध देशांतर्गत आहे. भारताची चिंता आम्ही समजू शकतो. आपल्या शेजारील देशात जर मोठी घडामोड घडत असेल, तर चिंता होणे स्वाभाविकच आहे. विशेषत: पंतप्रधान मोदी यांनी शेजारील देशांसोबतच्या संबंधांना विशेष महत्त्व दिले असताना भारताची चिंता योग्यच आहे. त्यांच्या चिंतेचे आम्ही लवकरच निराकरण करू, असे सांगताना, मोदी यांनी आमच्या देशाला भेट दिली नाही, याचे दु:ख आम्हाला आहे, असे त्या म्हणाल्या.