Home » ठळक बातम्या, राजकीय, राष्ट्रीय » भाजपाच्या राष्ट्रीय कार्यकारिणीची बैठक आजपासून

भाजपाच्या राष्ट्रीय कार्यकारिणीची बैठक आजपासून

=अलाहाबाद सज्ज=
bjp-flagनवी दिल्ली, [११ जून] – उद्या रविवारपासून सुरू होणार्‍या भाजपाच्या राष्ट्रीय कार्यकारिणीच्या द्विदिवसीय बैठकीसाठी त्रिवेणी संगमाचे अलाहाबाद शहर सज्ज झाले आहे. संपूर्ण शहर भाजपाचे झेंडे, होर्डिंग्ज आणि बॅनर यांनी सजले आहे. पंतप्रधान नरेंद्र मोदी आणि अन्य अति महत्त्वाच्या नेत्यांच्या आगमनामुळे शहरातील सुरक्षा व्यवस्था कडेकोट करण्यात आली आहे.
आज रात्री भाजपाच्या राष्ट्रीय महासचिवांच्या बैठकीचे आयोजन करण्यात आले आहे. उद्यापासून राष्ट्रीय कार्यकारिणीच्या बैठकीचा शुभारंभ राष्ट्रीय अध्यक्ष अमित शाह यांच्या भाषणाने होणार आहे. बैठकीचा समारोप पंतप्रधान नरेंद्र मोदी यांच्या भाषणाने होईल. कायस्थ पाठशाला क्रीडा मैदानावर राष्ट्रीय कार्यकारिणीची बैठक होत असून लगतच्याच परेड ग्राऊंड मैदानावर सोमवारी पंतप्रधान नरेंद्र मोदी यांच्या जाहीर सभेचे आयोजन करण्यात आले आहे. या सभेच्या माध्यमातून उत्तरप्रदेश विधानसभा निवडणुकीसाठी भाजपाच्या निवडणूक प्रचाराचा शंखनाद होणार आहे.
राष्ट्रीय कार्यकारिणीच्या बैठकीसाठी भव्य आणि सर्व सोयी-सुविधांनी युक्त असा वातानुकूलित मंडप उभारण्यात आला आहे. संपूर्ण शहरात कडेकोट सुरक्षा व्यवस्था करण्यात आली आहे. एसपीजीने बैठकीचे स्थळ आणि जाहीरसभेच्या ठिकाणाचा ताबा घेतला आहे. स्थानिक पोलिसांनी सर्व मार्गांची नाकेबंदी केली आहे. आज बैठकीच्या पूर्वसंध्येला या सुरक्षा व्यवस्थेचा आढावाही घेण्यात आला.
संपूर्ण शहर भाजपाचे झेंडे, बॅनर, होर्डिंग्ज, पंतप्रधान नरेंद्र मोदी आणि भाजपाचे राष्ट्रीय अध्यक्ष अमित शाह यांचे कटआऊट यांनी सजवण्यात आले आहे. पुढील वर्षी उत्तरप्रदेशात विधानसभेची निवडणूक होऊ घातली आहे, त्यामुळे या बैठकीला विशेष महत्त्व प्राप्त झाले आहे. पंडित मोतीलाल नेहरू, जवाहरलाल नेहरू आणि इंदिरा गांधी यांच्या राजकीय जीवनाचा शुभारंभ अलाहाबाद शहरातूनच झाला होता. अलाहाबादला लागून असलेल्या फुलपूर मतदारसंघातून पंडित जवाहरलाल नेहरू लोकसभेवर विजयी झाले होते. आज या मतदारसंघातील भाजपाचे खासदार असलेले केशवप्रसाद मौर्य उत्तरप्रदेश भाजपाचे अध्यक्ष आहेत.
उत्तरप्रदेश विधानसभा निवडणुकीसाठी भाजपाच्या मुख्यमंत्रिपदाच्या उमेदवाराच्या नावावर या बैठकीत चर्चा होण्याची शक्यता आहे. या मुद्यावर भाजपात दोन मतप्रवाह आहेत. मुख्यमंत्रिपदाचा उमेदवार जाहीर करून निवडणूक लढवावी, असे एका गटाला वाटते, तर आधी उमेदवाराचे नाव जाहीर न करता निवडणूक लढवावी, असे दुसर्‍या गटाला वाटते. भाजपात मुख्यमंत्रिपदासाठी अनेक सक्षम उमेदवारांच्या नावाची चर्चा सुरू आहे. या बैठकीनंतर भाजपाचे राष्ट्रीय अध्यक्ष अमित शाह आपल्या नव्या राष्ट्रीय कार्यकारिणीचीही घोषणा करतील, असा अंदाज आहे. अध्यक्षपदी निवड झाल्यानंतर शाह यांनी आपल्या नव्या कार्यकारिणीची अद्याप घोषणा केलेली नाही.

Short URL: https://vrittabharati.in/?p=28544

Posted by on Jun 12 2016. Filed under ठळक बातम्या, राजकीय, राष्ट्रीय. You can follow any responses to this entry through the RSS 2.0. You can leave a response or trackback to this entry

Leave a Reply

Change Language: press Ctrl+g

Photo Gallery

हवामान

एका नजरेत

FEATURED VIDEOS

ARCHIVES

Search by Date
Search by Category
Search with Google
More in ठळक बातम्या, राजकीय, राष्ट्रीय (253 of 2453 articles)


मॅक्सिको, [९जून] - पंतप्रधान नरेंद्र मोदी हे पाच देशांच्या दौर्‍यावर असून दौर्‍याचा अंतिम टप्पा असलेल्या मॅक्सिकोमध्ये पोहोचले आहेत. यावेळी पंतप्रधान ...

×