कर्नाटक निवडणूक: भाजपाच्या १८९ उमेदवारांची घोषणा

Posted by वृत्तभारती Wednesday, April 12th, 2023

– ५२ नव्या चेहऱ्यांना दिली संधी,
नवी दिल्ली, (१२ एप्रिल) – कर्नाटक विधानसभा निवडणुकीसाठी भाजपाने मंगळवारी रात्री आपल्या १८९ उमेदवारांच्या नावांची घोषणा केली. कर्नाटक भाजपाचे निवडणूक प्रभारी केंद्रीय मंत्री धर्मेद्र प्रधान तसेच भाजपा महासचिव तसेच कर्नाटकचे प्रभारी अरुणसिंह यांनी भाजपा उमेदवारांच्या नावांची घोषणा केली.
मुख्यमंत्री बसवराज बोम्मई यांना भाजपाने त्यांच्या परंपरागत शिगावमधून उमेदवारी दिली. भाजपाच्या यादीत ५२ नवीन चेहर्यांचा समावेश आहे. या यादीत ओबीसीच्या ३२, अनुसूचित जातीच्या ३० तर अनुसूचित जमातीच्या १६ उमेदवारांचा समावेश आहे. ८ महिलांनाही भाजपाने उमेदवारी दिली. माजी मुख्यमंत्री बी. एस. येदीयुरप्पा यांच्या मुलाला बी. वाय. विजयेंद्रला शिकारपूर मतदारसंघातून उमेदवारी देण्यात आली. भाजपा महासचिव सी. टी. रवी चिकमंगळूर मतदारसंघातून निवडणूक लढवतील. मंत्री आर. अशोक तसेच व्ही. सोमन्ना यांना प्रत्येकी दोन मतदारसंघांतून उमेदवारी देण्यात आली आहे.
कनकपुरा मतदारसंघात अशोक हे काँग्रेस अध्यक्ष डी. के. शिवकुमार यांना टक्कर देतील. याशिवाय पद्मनाभनगरमध्येही भाजपाने अशोक यांना उमेदवारी दिली. वरुण मतदारसंघात व्ही. सोमन्ना माजी मुख्यमंत्री सिद्धरामय्या यांच्याविरोधात निवडणूक लढतील. चामराजनगरमधूनही पक्षाने त्यांना उमेदवारी दिली. आरोग्यमंत्री सुधाकरन चिक्कबल्लापूर तर अन्य मंत्री डॉ. अश्वथनारायण मल्लेश्वरम मतदारसंघातून निवडणूक लढवतील. २०१८ च्या निवडणुकीत भाजपाने १०४ जागा जिंकल्या होत्या.

• राज्य
• राष्ट्रीय

Short URL : https://vrittabharati.in/?p=51921

Related posts