उज्जैनच्या महाकालेश्वर मंदिरात बांधणार विशेष बोगदा

Posted by वृत्तभारती Tuesday, October 3rd, 2023

– ८ लाख भाविक घेऊ शकतील दर्शन,
इंदूर, (०३ ऑक्टोबर) – बारा ज्योतिर्लिंगांपैकी एक असलेल्या मध्यप्रदेशच्या उज्जैन येथील महाकालेश्वर मंदिर संकुलात विशेष बोगदा बांधला जात आहे. या बोगद्याच्या निर्माणानंतर सुमारे ८ लाख भाविक सहजपणे परिसराला भेट देऊ शकणार आहेत. मुख्यमंत्री शिवराजसिंह चौहान ५ ऑक्टोबर रोजी २४२.३५ कोटी रुपये खर्चून बांधण्यात आलेल्या श्री महाकाल महालोक कॉरिडॉरच्या दुसर्या टप्प्याचे लोकार्पण करतील.
महाकालेश्वर मंदिरात दररोज किमान दोन लाख भाविक दर्शनाला येतात. मात्र, सणासुदीच्या काळात ही संख्या दिवसाला सुमारे ३ लाखांवर जाते, तेव्हा गर्दीवर नियंत्रण ठेवणे सोपे नसते, असे उज्जैनचे जिल्हाधिकारी कुमार पुरुषोत्तम यांनी वृत्तसंस्थेला सांगितले. अशा परिस्थितीला तोंड देण्यासाठी महाकालेश्वर मंदिरात भाविकांच्या सोईसाठी खास बोगदा बांधण्यात येत आहे. या बोगद्यामुळे दररोज सुमारे आठ लाख भाविक मंदिरात येऊ शकतील, असे ते म्हणाले.
श्री महाकाल महालोक कॉरिडॉरच्या दुसर्या टप्प्यात नीलकंठ, शक्तिपथ, अण्णा, महाराजवाडा कॉम्प्लेक्स आणि छोटा रुद्रसागर भागातील विकास कामांचा समावेश आहे. दुसर्या टप्प्यात एक विशेष जागा तयार केली जात आहे, जेथून हजारो भाविक मंदिराचा कळस पाहू शकतील. महाकालेश्वर मंदिर समितीचे प्रशासक संदीप कुमार सोनी म्हणाले की, प्रकल्पांतर्गत मंदिर परिसरात कृत्रिम बुद्धिमत्ताने सुसज्ज सुमारे ७०० कॅमेरे बसविण्यात आले आहेत.

• राष्ट्रीय

Short URL : https://vrittabharati.in/?p=55989

Related posts