जूनमध्ये १२ टक्क्यांनी वाढले जीएसटी संकलन

Posted by वृत्तभारती Sunday, July 2nd, 2023

– केंद्रीय अर्थ मंत्रालयाची माहिती,
नवी दिल्ली, (०२ जुलै) – जून महिन्यात वस्तू व सेवा कर (जीएसटी) संकलन १२ टक्क्यांनी वाढून १.६१ लाख कोटी रुपयांवर पोहोचले आहे, अशी माहिती केंद्रीय अर्थ मंत्रालयाने शनिवारी दिली. सहा वर्षांपूर्वी अप्रत्यक्ष करपद्धत लागू झाल्यानंतर एकूण जीएसटी संकलनाने चौथ्यांदा १.६० लाख कोटी रुपयांचा टप्पा ओलांडला आहे. २०२१-२२, २०२२-२३ आणि २०२३-२४ मधील पहिल्या तिमाहीत सरासरी जीएसटी संकलन अनुक‘मे १.१० लाख कोटी, १.५१ लाख कोटी आणि १.६९ लाख कोटी रुपये झाले आहे, असे केंद्रीय अर्थमंत्रालयाने जारी केलेल्या निवेदनात म्हटले आहे.
जून २०२३ मध्ये १,६१,४९७ कोटी रुपयांचा एकूण जीएसटी महसूल प्राप्त झाला. त्यात केंद्रीय जीएसटी ३१,०१३ कोटी रुपये, राज्य जीएसटी ३८,२९२ कोटी रुपये, एकात्मिक जीएसटी ८०,२९२ कोटी रुपये (आयातीत वस्तूंवरील ३९,०३५ कोटी रुपयांसह) आणि ११,९०० कोटी रुपयांच्या उपकराचा (आयातीत वस्तूंवरील १,०२८ कोटी रुपयांसह) समावेश आहे, असे अर्थ मंत्रालयाने जारी केलेल्या निवेदनात म्हटले आहे.
जून २०२३ मध्ये प्राप्त झालेला महसूल हा मागील वर्षातील समान कालावधीच्या तुलनेत १२ टक्क्यांनी जास्त आहे. या महिन्यात देशांतर्गत व्यवहारातून (सेवांच्या आयातीसह) महसूल गेल्या वर्षीच्या समान कालावधीत या स्रोतांपासून मिळालेल्या महसुलापेक्षा १८ टक्क्यांनी जास्त आहे. एप्रिल महिन्यात १.८७ लाख कोटी रुपयांचे विक‘मी जीएसटी संकलन झाले होते. मे महिन्यात हे संकलन १.५७ लाख कोटी रुपये होते.

• राष्ट्रीय

Short URL : https://vrittabharati.in/?p=53227

Related posts