पंजाबमध्ये पाडलेल्या पाकी ड्रोनने केले होते चीनमध्ये उड्डाण

Posted by वृत्तभारती Wednesday, March 1st, 2023

– न्यायवैद्यक विश्लेषणातील माहिती,
नवी दिल्ली, (१ मार्च) – पंजाबमधील अमृतसर सेक्टरमध्ये मागील वर्षी २५ डिसेंबर रोजी पाडण्यात आलेल्या पाकिस्तानी ड्रोनने भारतात घुसखोरी करण्यापूर्वी चीनमध्ये तसेच पाकिस्तानमधील २८ ठिकाणांवर उड्डाण केले होते, अशी माहिती न्यायवैद्यक विश्लेषणातून समोर आल्याचे सीमा सुरक्षा दलाने (बीएसएफ) आपल्या अहवालात म्हटले आहे.
मागील वर्षी २५ डिसेंबर रोजी बीएसएफच्या पथकाने पाकिस्तानातून आलेले ड्रोन पाडले होते. या प्रकरणाच्या तपासाचा आदेश देण्यात आला होता. हा अहवाल त्या तपासाचा भाग असल्याचे बीएसएफच्या एका वरिष्ठ अधिकार्याने सांगितले. पाकिस्तानी क्वाडकॉप्टर ड्रोनने चीनमधील फेंग शियांग जिल्ह्यात ११ जून २०२२ रोजी उड्डाण केले होते आणि त्यानंतर २४ सप्टेंबर २०२२ ते २५ डिसेंबर २०२२ या कालावधीत या ड्रोनने खानवाल परिसरातील विविध ठिकाणांवर २८ वेळा उड्डाण केले होते, असे विश्लेषणातून समोर आले आहे.
बीएसएफने पाडलेल्या ड्रोनमधून या त्याने पाकिस्तान आणि चीनमध्ये उड्डाण केल्याचे पुरावे समोर आले असल्याचे या अहवालात म्हटले आहे. या पाकिस्तानी ड्रोनने २५ डिसेंबर रोजी सायंकाळी पावणेआठ वाजता आंतरराष्ट्रीय सीमेवरील अमृतसर सेक्टरमधील राजाताल चौकीजवळ भारतीय हद्दीत घुसखोरी केली होती. बीएसएफने गोळीबार करून हे ड्रोन पाडले होते. त्यानंतर न्यायवैद्यक परीक्षणासाठी ते बीएसएफच्या मु‘यालयात पाठवण्यात आले होते.

• राष्ट्रीय

Short URL : https://vrittabharati.in/?p=50192

Related posts