लडाखमध्ये चार इस्रायली हेरॉन ड्रोन्स तैनात

Posted by वृत्तभारती Wednesday, December 1st, 2021

चीनच्या कुरापतींवर ठेवणार नजर,
नवी दिल्ली, ३० नोव्हेंबर – इस्रायलकडून विकत घेतलेले चार हेरॉन ड्रोन्स भारतीय लष्कराने लडाखच्या सीमेवर तैनात केले आहेत. या ड्रोन्सचे कॅमेरे, संवेदक आणि रडार ससाण्याच्या नजरेप्रमाणे तीक्ष्ण असल्याने चीनच्या कुरापतींवर बारीक नजर ठेवणे शक्य होणार आहे.
या ड्रोन्सच्या माध्यमातून चिनी लष्कराच्या प्रत्येक हालचालीची माहिती भारतीय लष्कराला मिळणार आहे. भारताचा प्रत्यक्ष नियंत्रण रेषेवर एप्रिल २०२० पासून चीनसोबत संघर्ष सुरू झाला आहे. त्यामुळे लडाख येथे शस्त्रास्त्रे, विमान, क्षेपणास्त्रांची संख्या भारताने वाढवली आहे. चिनी लष्करावर नजर ठेवण्यासाठी उपग्रहांची मदत घेतली जात होती. मात्र, आता हेरॉन ड्रोन्सच्या मदतीने नजर ठेवण्यासाठी लष्कराला मदत मिळणार आहे. हे चारही ड्रोन्स लेहमध्ये दाखल झाल्याची माहिती केंद्राच्या एका उच्चपदस्थ अधिकार्‍याने दिली.
कोणत्याही वातावरणात उड्डाणासाठी सक्षम
दिवस असो किंवा रात्र, वातावरण कसेही असले तरी, हे ड्रोन उड्डाण करण्यास सक्षम आहे. या ड्रोनमध्ये कित्येक प्रकारचे संवेदक आणि कॅमेरे आहेत. यातील थर्मोग्राफिक किंवा इन्फ्रारेड कॅमेर्‍याच्या मदतीने रात्रीही नजर ठेवणे शक्य आहे. यातील व्हिजिबल लाईट एअरबॉर्न ग्राऊंड सर्व्हिलान्स कॅमेर्‍याच्या माध्यमातून दिवसा छायाचित्रे काढणे शक्य होते. हवेतूनच लक्ष्याची अचूक माहिती जमिनीवरील तोफखाना किंवा रणगाड्यांना देण्याची क्षमता हेरॉनमध्ये आहे. ही माहिती मिळाल्यावर जमिनीवरून इन्फ्रारेड सीकर क्षेपणास्त्र डागणे शक्य होते.
ऍण्टिजामिंग तंत्रज्ञान
हे चारही ड्रोन्स अत्याधुनिक आहेत. भारतीय लष्करात सध्या असलेल्या ड्रोन्सच्या तुलनेत याची ताकद, क्षमता, उड्डाण क्षमता कितीतरी जास्त आहे. या ड्रोन्समध्ये ऍण्टिजामिंग तंत्रज्ञानाचा वापर करण्यात आला असून, लष्करातील इतर ड्रोन्सच्या तुलनेत हे कितीतरी शक्तिशाली आहेत.
५२ तासांची उड्डाणक्षमता
हेरॉन ड्रोन्स हवेत झेपावल्यानंतर ५२ तास उड्डाण करण्याची क्षमता त्यात आहे. हे ड्रोन आवाज न करता ३५ हजार फूट उंचीवर उडू शकते. यावर नियंत्रण ठेवण्यासाठी जमिनीवर नियंत्रण कक्ष स्थापन केला जातो. यात मानवी आणि स्वयंचलित नियंत्रण तंत्रज्ञान यंत्रणा असते.

• राष्ट्रीय

Short URL : https://vrittabharati.in/?p=46468

Related posts