१०० वे सुखोई-३० हवाई दलाकडे सुपूर्द

Posted by वृत्तभारती Saturday, April 8th, 2023

– एचएएलची जबरदस्त कामगिरी,
नाशिक, (०८ एप्रिल) – हिंदुस्थान एरोनॉटिक्स लिमिटेडने (एचएएल) शुक्रवारी १०० वे सुखोई-३० एमकेआय लढाऊ विमान दुरुस्ती आणि ओव्हरहॉलिंग करून हवाई दलाच्या सुपूर्द केले. यासह, शुक्रवारीच एचएएलने लाईट कॉम्बॅट एअरक्राफ्ट (एलसीए) तेजसचे उत्पादन वाढवण्यासाठी तिसरी असेम्बली लाईन उघडली आहे, ज्याचे उद्घाटन देशाचे संरक्षण सचिव गिरिधर अरमाने यांनी केले. संरक्षण बाजारपेठेत आक्रमकपणे स्पर्धा करण्यासाठी आणि मानवरहित वाहनांसारख्या नवीन क्षेत्रांचा शोध घेण्यासाठी त्यांनी एचएएलला पुढाकार घेण्याचे आवाहन त्यांनी केले.
संरक्षण सचिव गिरिधर अरमाने यांनी शुक‘वारी एचएएलच्या नाशिक विभागात लाईट कॉम्बॅट एअरक्राफ्ट (एलसीए) निर्मितीसाठी नवीन प्लांटचे उद्घाटन केले. ही तिसरी असेम्बली लाईन उघडल्याने एलसीएच्या उत्पादनाला गती मिळेल. एलसीए सुरुवातीला एलसीए मार्क-१ आणि मार्क-१ए ची १८ ट्रेनर विमाने तयार करणार आहे, ज्यापैकी पहिल्या एफओसी ट्रेनरने ५ एप्रिल रोजी ३५ मिनिटांसाठी हवेत पहिले उड्डाण केले. एलसीएच्या दुसर्या असेम्बली लाईनचे उद्घाटन संरक्षण मंत्री राजनाथ सिंह यांच्या हस्ते २१ फेब्रुवारी रोजी बंगळुरू युनिटमध्ये करण्यात आले होते. त्याच्या दुसर्या दिवशी एरो इंडिया दरम्यान एचएएलकडून ८३ एलसीए विमानांचा करार झाला.
हवाई दलाच्या सुखोई-३० एमकेआय लढाऊ विमानांची एचएएलच्या नाशिक विभागातच दुरुस्ती आणि ओव्हरहॉलिंग करून आधुनिकीकरण केले जात आहे. १०० व्या सुखोई विमानाचे सिग्नल आऊट सर्टिफिकेट (एसओसी) हवाई दलाचे असिस्टंट चीफ ऑफ एअर स्टाफ एअर व्हाइस मार्शल सरीन यांच्याकडे सुपूर्द करण्यात आले. यावेळी उपस्थित एचएएलचे मुख्य व्यवस्थापकीय संचालक अनंतकृष्णन उपस्थित होते. अनेक आव्हाने असूनही एचएएलचा नाशिक विभाग दरवर्षी २० सुखोई-३० विमानांची दुरुस्ती आणि ओव्हरहॉलिंग करीत आहे, असे त्यांनी सांगितले.

• राष्ट्रीय

Short URL : https://vrittabharati.in/?p=51831

Related posts