इशाऱ्यानंतरही कुराणावर स्वीडनचे मोठे पाऊल

Posted by वृत्तभारती Thursday, July 20th, 2023

स्टॉकहोम, (२० जुलै) – गेल्या महिन्यात बकरीदच्या दिवशी स्वीडनची राजधानी स्टॉकहोम येथील सर्वात मोठ्या मशिदीबाहेर कुराण जाळल्याचा वाद अजूनही शमला नव्हता तोच स्वीडनच्या पोलिसांनी पुन्हा एकदा कुराण जाळण्याची परवानगी दिली होती. बकरीदला कुराण जाळणाऱ्या सलमान मोमिका नावाच्या इराकी निर्वासिताला आता गुरुवारी पुन्हा कुराण जाळण्याची परवानगी मिळाली असून, या पार्श्वभूमीवर इराकची राजधानी बगदादमध्ये प्रचंड निदर्शने पाहायला मिळत आहेत. कुराणाची प्रत जाळल्यामुळे आणि नंतर पुन्हा असे कृत्य करण्यास परवानगी मिळाल्याने संतप्त झालेल्या इराकांनी बगदादमधील स्वीडिश दूतावासावर हल्ला केला आणि दूतावासाच्या कंपाऊंडला आग लावली. ही घटना गुरुवारी सकाळी घडली.
सोशल मीडियावर शेअर केलेल्या व्हिडिओंमध्ये निदर्शक दूतावासात झेंडे आणि इराकचे प्रभावशाली शिया धार्मिक आणि राजकीय नेते मुक्तादा अल-सद्र यांची छायाचित्रे असलेली चिन्हे हलवताना दिसत आहेत. त्यांनी दूतावासाची तोडफोड केली आणि नंतर कंपाऊंडला आग लावली. एका वृत्तानुसार, इराकच्या परराष्ट्र मंत्रालयाने स्वीडिश दूतावासावरील हल्ल्याचा तीव्र निषेध केला आहे. परराष्ट्र मंत्रालयाने एका निवेदनात म्हटले आहे की, ‘इराक सरकारने या घटनेची त्वरित चौकशी करण्याचे आदेश सुरक्षा अधिकाऱ्यांना दिले आहेत. दूतावासावर कोणत्या परिस्थितीत हल्ला झाला याची चौकशी करण्यास सांगितले आहे. अधिकाऱ्यांना दोषींची ओळख पटवून त्यांना कायद्यानुसार जबाबदार धरण्यासाठी आवश्यक उपाययोजना करण्याचे निर्देश देण्यात आले.
त्याचवेळी, स्वीडनच्या परराष्ट्र मंत्रालयाने म्हटले आहे की, दूतावासावरील हल्ल्यात आणि जाळपोळीत दूतावासातील कर्मचाऱ्यांना कोणतीही हानी झाली नाही, सर्वजण सुरक्षित आहेत. मंत्रालयाने म्हटले आहे की राजनैतिक मिशन आणि त्यांच्या कर्मचार्‍यांचे संरक्षण करणे ही इराकी अधिकाऱ्यांची जबाबदारी आहे. त्याचवेळी, स्वीडिश दूतावासातील सर्व कर्मचारी सुरक्षित असल्याची पुष्टीही एका सूत्राने केली आहे. मात्र, अधिक माहिती देण्यास त्यांनी नकार दिला. प्रभावशाली इराकी नेता अल-सद्र यांच्या टेलीग्राम ग्रुपमध्ये निषेधाची हाक देण्यात आली होती. स्वीडनमध्ये दुसऱ्यांदा कुराण जाळण्याच्या योजनेच्या निषेधार्थ स्वीडिश दूतावासाबाहेर आंदोलन करण्यात यावे, असे पोस्टमध्ये लिहिले होते.

• आंतरराष्ट्रीय

Short URL : https://vrittabharati.in/?p=53589

Related posts