ऑक्सफर्डच्या डिक्शनरीत ‘देश’, ‘बिंदास’ शब्दांचा समावेश

Posted by वृत्तभारती Tuesday, January 31st, 2023

-भारतीय इंग्रजीशी संबंधित ८०० पेक्षा जास्त नोंदी,
लंडन, (३१ जानेवारी) – ऑक्सफर्ड इंग्लिश डिक्शनरीमध्ये(ओईडी) ‘देश’ आणि ‘बिंदास’ यासारख्या शब्दांसह भारतीय इंग्रजीशी संबंधित ८०० पेक्षा जास्त नोंदींचे उच्चार, प्रतिलेखन आणि ऑडिओ आता उपलब्ध आहेत.
भारतीय इंग्रजीने ओईडीच्या उच्चारांमध्ये आणि जागतिक इंग्रजी उच्चारण ऑडिओ आर्काइव्हमध्ये अलिकडेच समाविष्ट केल्याने देशातील १३० दशलक्ष भारतीय इंग्रजी भाषिकांसाठी मोठी पोकळी भरून आली आहे, असे ऑक्सफर्ड युनिव्हर्सिटीच्या प्रेसने सांगितले. जेव्हापासून आम्ही ब्रिटिश आणि अमेरिकी इंग्रजी व्यतिरिक्त इंग्रजीच्या विविध प्रकारच्या उच्चारांच्या ऑडिओचा विस्तार आणि समावेश करण्याचे काम सुरू केले, तेव्हापासून भारतीय इंग्रजी ही आमची सर्वांत मोठी प्राथमिकता आहे आणि आमच्या सर्वांत मोठ्या आव्हानांपैकी एक आहे, असे ओईडीचे उच्चारण संपादक डॉ. कॅथरिन सँगस्टर यांनी सांगितले. यातील जटीलता कमी करण्यासाठी आम्ही याचे प्रतिलेखन मॉडेल विकसित केले असल्याचा मला आनंद आहे आणि आता ओईडीमध्ये इंग्रजीच्या या अत्यंत महत्त्वाच्या विविधतेसाठी उच्चार देऊ शकतो, असे सँगस्टर यांनी सांगितले.
दिया, बच्चा, अलमिरा…
डिक्शनरीत समावेश झालेल्या इतर भारतीय शब्दांमध्ये ‘दिया’, ‘बच्चा’ आणि ‘अलमिरा’चा समावेश आहे. जगभरातील इंग्रजी भाषेच्या असलेल्या विविध छटांवर ओईडीने २०१६ पासून लक्ष केंद्रित केले असून, उच्चारणांचा संग्रह वाढवला जात आहे. विशिष्ट प्रदेशांत वापरल्या जाणार्या शब्दांसाठी संपूर्ण डिक्शनरीत मानक म्हणून दिलेल्या ब्रिटिश-अमेरिकन उच्चारांसह अर्थ देण्यात आला आहे.

• आंतरराष्ट्रीय

Short URL : https://vrittabharati.in/?p=48151

Related posts