जयशंकर, ब्लिंकन यांच्यात चर्चा

Posted by वृत्तभारती Friday, September 29th, 2023

वॉशिंग्टन, (२९ सप्टेंबर) – भारत-कॅनडा राजनैतिक वादाच्या पृष्ठभूमीवर भारताचे परराष्ट्र मंत्री एस. जयशंकर यांनी परराष्ट्र व्यवहार मंत्री अँटनी ब्लिंकन यांची भेट घेतली व जागतिक घडामोडींवर चर्चा केली. या चर्चेत भारत व अमेरिकेने संरक्षण, अंतराळ व स्वच्छ ऊर्जा यासार‘या क्षेत्रांमध्ये द्विपक्षीय सहकार्याच्या निरंतर महत्त्वावर भर दिला आहे. खलिस्तानी फुटिरतावाद्यांच्या हत्येवरून भारत व कॅनडा यांच्यात राजनैतिक वाद सुरू आहे.
जयशंकर सध्या वॉशिंग्टन डीसीच्या पाच दिवसांच्या अधिकृत दौर्यावर आहेत. राष्ट्राध्यक्ष ज्यो बायडेन व पंतप्रधान नरेंद्र मोदी यांची भेट झाल्यानंतर नवी दिल्लीत नुकत्याच झालेल्या जी-२० शिखर परिषदेनंतर परराष्ट्र विभागातील गुरुवारची बैठक ही दोन्ही देशांदरम्यानची सर्वोच्च स्तरीय चर्चा होती. आज माझे मित्र अँटनी ब्लिंकन यांना स्टेट डिपार्टमेंटमध्ये भेटून आनंद झाला. पंतप्रधान नरेंद्र मोदी यांच्या जून महिन्यातील भेटीचा पाठपुरावा करून जयशंकर यांनी ब्लिंकन यांच्याशी सविस्तर चर्चा केली तसेच जागतिक घडामोडींवरसुद्धा विचारविनिमय केला. लवकरच आमच्या २+२ बैठकीची पायाभरणी होईल, असे जयशंकर यांनी पोस्टमध्ये म्हटले आहे.
भारत-अमेरिका २+२ मंत्रिस्तरीय संवादाच्या पाचव्या आवृत्तीचे नवी दिल्ली येथे आयोजन करण्यात येणार आहे. त्यांनी बैठकीच्या तारखा जाहीर केल्या नसल्या तरी नोव्हेंबरच्या पूर्वार्धात मंत्रिस्तरीय संवाद होणार असल्याचे कळते. संरक्षण मंत्री लॉयड ऑस्टिन यांच्यासह ब्लिंकन हे अमेरिकन शिष्टमंडळाचे प्रतिनिधित्व करणार आहेत, तर जयशंकर व संरक्षण मंत्री राजनाथ सिंह हे भारतीय शिष्टमंडळाचे नेतृत्व करतील.

• आंतरराष्ट्रीय

Short URL : https://vrittabharati.in/?p=55801

Related posts