पाकिस्तानची चीन, सौदीकडे ११ अब्ज डॉलर्सची मागणी

Posted by वृत्तभारती Saturday, September 30th, 2023

– आर्थिक संकट आणखी गडद,
इस्लामाबाद, (३० सप्टेंबर) – आंतरराष्ट्रीय नाणेनिधी अर्थात् आयएमएफचा बेलआऊट कार्यक्रम सुरळीत सुरू राहावा आणि देशात आर्थिक स्थिरता दिसावी, यासाठी सध्या आर्थिक संकटात असलेला पाकिस्तानन बाह्य आणि देशांतर्गत संसाधनांमधील अंतर भरून काढण्यासाठी चीन आणि सौदी अरबकडून सुमारे ११ अब्ज डॉलर्सची मदत मागितली आहे. किरकोळ, कृषी आणि रिअल इस्टेट क्षेत्रातील कर जाळ्याचा प्रभावीपणे विस्तार करण्यासाठी आणि बेकायदेशीर चलन हालचालींवर कारवाई सुरू ठेवण्यासाठी काळजीवाहू सरकारच्या दबावादरम्यान ही माहिती समोर आली आहे.
ही माहिती कार्यवाहक अर्थमंत्री शमशाद अख्तर यांनी गुरुवारी इस्लामाबादेत सिनेट सदस्य सलीम मांडवीवाला यांच्या अध्यक्षतेखाली वित्त आणि महसूलविषयक स्थायी समितीसमोर जारी केलेल्या तपशीलवार धोरणात्मक विधानाचा भाग होती, असे डॉन वृत्तपत्राने वृत्त दिले आहे. त्या म्हणाल्या की, सरकार सध्या आर्थिक पुनरुज्जीवन योजनेवर काम करीत आहे, जे लवकरच काळजीवाहू पंतप्रधान अन्वर उल हक कक्कर यांना सादर केले जाईल आणि अर्थविषयक सिनेटच्या स्थायी समितीला सामायिक केले जाईल.
शमशाद अख्तर म्हणाल्या की, काळजीवाहू सरकारकडे सखोल संरचनात्मक सुधारणा करण्यास मर्यादित वाव आहे, परंतु ७०० दशलक्ष कर्जाचे वितरण सुनिश्चित करण्यासाठी आंतरराष्ट्रीय नाणेनिधी कार्यक‘माचा भाग असलेल्या सुधारणा पूर्ण करण्याचे आश्वासन दिले. ऑक्टोबरच्या अखेरीस आयएमएफशी याबाबत चर्चा सुरू होईल. आयएमएफने जूनमध्ये पाकिस्तानसोबत नऊ महिन्यांच्या स्टॅण्ड-बाय व्यवस्थेवर अंदाजे ३ अब्ज डॉलर्सचा कर्मचारीस्तरीय करार केला.

• आंतरराष्ट्रीय

Short URL : https://vrittabharati.in/?p=55818

Related posts