पाकिस्तानच्या धार्मिक व्यवहार मंत्र्यांचा रस्ता अपघातात मृत्यू

Posted by वृत्तभारती Sunday, April 16th, 2023

इस्लामाबाद, (१६ एप्रिल) – पाकिस्तानचे धार्मिक व्यवहार मंत्री मुफ्ती अब्दुल शकूर यांचा रस्ता अपघातात मृत्यू झाला. इस्लामाबाद पोलिसांनी एका निवेदनात म्हटले आहे की, शनिवारी मॅरियटहून सेक्रेटरीएट स्क्वेअरकडे जात असताना मंत्र्यांची कार हिलक्स रेव्हो कारला धडकली, त्यानंतर त्यांना पॉलीक्लिनिक हॉस्पिटलमध्ये नेण्यात आले. पोलिसांनी दिलेल्या माहितीनुसार, रुग्णालयात डॉक्टरांनी त्यांना मृत घोषित केले.
पोलिसांनी सांगितले की, अपघाताच्या वेळी वाहनात असलेल्या पाच जणांना ताब्यात घेतले असून त्यांची चौकशी सुरू करण्यात आली आहे. इस्लामाबादचे पोलिस महानिरीक्षक अकबर नासिर खान यांनी प्रसार माध्यमांना सांगितले की, अपघात झाला तेव्हा मंत्री स्वत: त्यांची कार चालवत होते आणि ते कारमध्ये एकटेच होते. डोक्याला मार लागल्याने त्यांचा जागीच मृत्यू झाला, असे खान यांनी सांगितले. गृहमंत्री राणा सनाउल्लाह यांनी या घटनेच्या सखोल चौकशीचे आदेश दिले आहेत. शकूर मौलाना फजलुर रहमानच्या जमियत उलेमा-ए-इस्लाम फझल चे ज्येष्ठ सदस्य होते, त्यांचा पक्ष सत्ताधारी आघाडीचा भाग आहे. खैबर-पख्तुनख्वा प्रांतातील लक्की मारवत जिल्ह्यातील ’ताजबी खेल’ भागात मंत्र्याच्या अंत्यसंस्काराची नमाज अदा करण्यात येणार असल्याचे जमियत उलेमा-ए-इस्लाम फझल ने म्हटले आहे.
पंतप्रधान शेहबाज शरीफ यांनी शकूर यांच्या निधनाबद्दल शोक व्यक्त केला आणि एक अभ्यासू विद्वान, वैचारिक राजकीय कार्यकर्ते आणि एक चांगला माणूस म्हणून समाजासाठी दिलेल्या योगदानाबद्दल त्यांचे कौतुक केले. राष्ट्रपती डॉ. आरिफ अल्वी यांनीही मंत्री यांच्या निधनाबद्दल तीव्र दु:ख व्यक्त केले आणि देशातील आंतरधर्मीय सलोख्यासाठी त्यांच्या सेवांना आदरांजली वाहिली. शकूर काही महिन्यांपूर्वी चर्चेत आले होते, जेव्हा एका महिला अधिकार्‍याने त्यांच्यावर हज अफेयर्सचे महासंचालक म्हणून नियुक्ती करण्यास नकार दिल्याचा आरोप केला कारण ती महिला होती. मात्र, मंत्री शकूर यांनी हे आरोप फेटाळून लावले.

• आंतरराष्ट्रीय

Short URL : https://vrittabharati.in/?p=52092

Related posts