पाकिस्तान : ईशनिंदेचा आरोपी असलमला अटक

Posted by वृत्तभारती Saturday, March 25th, 2023

– हनुमानाचा केला होता अपमान,
इस्लामाबाद, (२४ मार्च) – शेजारील इस्लामिक देश पाकिस्तानच्या सिंध प्रांतात पोलिसांनी हनुमानाचा अपमान केल्याच्या आरोपाखाली पत्रकार असलमला बुधवारी अटक केली. असलमच्या या अटकेची पाकिस्तानात जोरदार चर्चा सुरू झाली आहे. ईशनिंदा कायद्याखाली असलम बलोचला झालेली अटक ही आश्चर्याची बाब बनली आहे. कारण या कलमांतर्गत आतापर्यंत केवळ अल्पसंख्यकांविरुद्ध विशेषत: हिंदूंवरच कारवाई केल्याचे दिसून आले आहे.
माध्यमांनी दिलेल्या माहितीनुसार, सिंधच्या मीरपूर खास तहसीलमधील लुहाना पंचायतीचे हे प्रकरण आहे. हिंदू नेते रमेश कुमार यांनी १९ मार्च रोजी असलम बलोच नावाच्या व्यक्तीच्या फेसबुक पोस्टविरुद्ध पोलिस ठाण्यात तक्रार केली होती. या पोस्टमध्ये असलमने हनुमानाचे चित्र जोडले होते आणि त्याखाली अपमानजनक मजकूर लिहिला होता. केवळ हिंदू समाजालाच नाही तर सिंधी मुस्लिमांनाही ही पोस्ट मुळीच पटली नसल्याचे रमेश यांनी सांगितले. बलोचने हे छायाचित्र व्हॉट्स अ‍ॅपवरही सामायिक केले. अखेर हिंदूंच्या धार्मिक भावना दुखावणार्या या पोस्टविरोधात रमेश यांनी पोलिस ठाण्यात तक्रार दाखल केली.
रमेश कुमार यांच्या तक्रारीवरून स्थानिक पोलिस अधिकार्यांनी असलम बलोचविरुद्ध गुन्हा नोंदवून कारवाई केली आणि पाकिस्तान दंड संहितेच्या कलम १५३ सह कलम २९५ लागू करण्यात आले. दोन पंथांमध्ये शत्रुत्व पसरवण्याच्या कारवायांसाठी हे कलम २९५ ए नोंदविण्यात येते. सिंधचे अल्पसंख्यक विभाग मंत्री ग्यानचंद इसरानी यांनीही याप्रकरणी पोलिस अधिकार्यांशी चर्चा केली. सिंधचे पोलिस महासंचालक आणि मीरपूरच्या पोलिस अधीक्षकांनी पत्रकार असलमच्या अटकेचे आदेश जारी केले. सिंधमध्ये कोणालाही दुसर्याच्या धर्माचा अपमान करण्याची परवानगी दिली जाऊ शकत नाही, असेही ते म्हणाले.

• आंतरराष्ट्रीय

Short URL : https://vrittabharati.in/?p=51387

Related posts