बालविवाह प्रकरणात ७८ महिलांसह २५०० जणांना अटक

Posted by वृत्तभारती Thursday, February 9th, 2023

दिसपूर, (९ फेब्रुवारी ) – आसाममध्ये बालविवाहाच्या प्रकरणात पोलिसांची कारवाई सुरू आहे. आतापर्यंत ४,०७४ गुन्हे दाखल झाले आहेत. त्यापैकी २,५२८ अटक करण्यात आली आहे. अटक करण्यात आलेल्यांमध्ये ७८ महिलांचाही समावेश आहे. अटक आरोपींना आसाममध्ये ठेवण्यासाठी तात्पुरते तुरुंग तयार केले जात आहे. कचार जिल्ह्याचे एसपी नोमल महत्ता यांनी सांगितले की, आम्हाला तात्पुरते तुरुंग बांधण्यास मंजुरी मिळाली आहे. हे सिलचरजवळील सरकारी संकुलात बांधले जाणार आहे. त्यांनी सांगितले की इमारत आधीच बांधली आहे. फक्त सुरक्षा व्यवस्था करावी लागेल. मात्र, कारागृहात जागा शिल्लक नसतानाच त्यांचा वापर केला जाईल.
गोलपारा येथील मटिया येथील अवैध निर्वासितांसाठी असलेल्या संक्रमण शिबिराचा उपयोग बालविवाह प्रकरणातील आरोपींना ठेवण्यासाठी केला जात आहे. संशयास्पद आणि बेकायदेशीर मार्गाने भारतात आलेल्या परदेशी लोकांना ठेवण्यासाठी आसाममधील हे पहिलेच कॅम्प आहे. त्याची क्षमता ३००० लोक ठेवण्याची आहे. दुसरीकडे आसाम सरकारच्या या कृतीवर विरोधकांनी प्रश्न उपस्थित केले आहेत. ही कारवाई केवळ लोकांना घाबरवण्यासाठी असल्याचे विरोधकांचे म्हणणे आहे. बालविवाह प्रकरणात अटक झालेल्यांचे नातेवाईकही पोलिस आणि आसाम सरकारविरोधात निदर्शने करत आहेत. कैलाश सत्यार्थी चिल्ड्रन फाऊंडेशनने आसाममध्ये केलेल्या कारवाईचे स्वागत केले आहे. मात्र, आसाम सरकारने पीडितांना आर्थिक-कायदेशीर मदत करून त्यांच्या पुनर्वसनाची व्यवस्था करावी, असे फाउंडेशनच्या वतीने सांगण्यात आले आहे. आरोपी पतीला जामीन मिळेपर्यंत सरकारने प्रत्येक महिलेला दरमहा २००० रुपयांची आर्थिक मदत द्यावी, अशी मागणी फाउंडेशनने केली आहे. त्याचवेळी एआयएमआयएम प्रमुख असदुद्दीन ओवेसी म्हणाले की, आसाम सरकारला बालविवाहाची समस्या संपवायची असेल तर साक्षरतेची पातळी वाढवायला हवी.

• राज्य

Short URL : https://vrittabharati.in/?p=48847

Related posts