‘परफ्यूम बॉम्ब’: दहशवाद्यांचे नवे शस्त्र!

Posted by वृत्तभारती Thursday, February 2nd, 2023

नवी दिल्ली, (२ फेब्रुवारी ) – जम्मू-काश्मीरच्या नरवालमध्ये दोन आयईडी स्फोट झाले. या हल्ल्यात ९ जण जखमी झाले आहेत. स्फोट घडवणार्‍या दहशतवाद्याला पोलिसांनी अटक केली आहे. हा दहशतवादी पाकिस्तानात बसलेल्या लष्कर-ए-तैयबाच्या हँडलरच्या संपर्कात होता. दहशतवाद्याकडे परफ्यूम बॉम्ब (परफ्यूम आयईडी) सापडला आहे. सुरक्षा दलांच्या म्हणण्यानुसार, या परफ्यूमला कोणी स्पर्श करता किंवा दाबताच त्याचा स्फोट होतो. विशेष म्हणजे जम्मू-काश्मीरमध्ये पहिल्यांदाच सुरक्षा दलांनी अशा प्रकारचा परफ्यूम बॉम्ब जप्त केला आहे.
जम्मू-काश्मीरचे डीजीपी दिलबाग सिंह यांनी सांगितले की, २० जानेवारीला दोन आयईडी बॉम्ब पेरण्यात आले होते. २१ जानेवारी रोजी २० मिनिटांच्या अंतराने हे स्फोट झाले. हे आयईडी एका मोठ्या कटाखाली पेरण्यात आले होते. पहिल्या स्फोटात ९ जण जखमीही झाले होते. यानंतर सुरक्षा दलांनी संपूर्ण परिसर रिकामा करून शोध मोहीम हाती घेतली. त्यानंतर दुसरा स्फोट झाला. अशा स्थितीत या स्फोटात कोणालाही इजा झालेली नाही. तर दुसरा स्फोट अतिशय वेगवान होता. याप्रकरणी दहशतवादी आरिफला अटक करण्यात आल्याचे दिलबाग सिंह यांनी सांगितले. तो रियासी येथील रहिवासी आहे. आरिफ हा सरकारी शिक्षक आहे. तो गेल्या ३ वर्षांपासून सीमेपलीकडील लष्कर-ए-तैयबाच्या हस्तकांशी संबंधित होता. दहशतवादी आरिफकडून परफ्यूम बॉम्ब जप्त करण्यात आला आहे. प्रथमच अशा प्रकारचा परफ्यूम आयईडी सापडला आहे. त्याने सांगितले की परफ्यूम बॉम्बमध्ये आयईडी आहे, जर कोणी त्याला स्पर्श केला, तो उघडला किंवा दाबण्याचा प्रयत्न केला तर त्याचा स्फोट होतो.
आरिफने कबूल केले आहे की फेब्रुवारी २०२२ मध्ये शास्त्रीनगरमध्ये आयईडी स्फोट झाला होता, ज्यामध्ये आरिफचा सहभाग होता. कटरा येथे झालेल्या स्फोटानंतर बसला आग लागली, आरिफने बसमध्ये आयईडी पेरल्याचे मान्य केले आहे. वास्तविक, मे २०२२ मध्ये ही बस भाविकांसह वैष्णोदेवीला जात होती, तेव्हाच हा स्फोट झाला. यामध्ये चार जणांचा मृत्यू झाला. तर २२ जण जखमी झाले आहेत. त्याने सांगितले की, डिसेंबरमध्ये आरिफला तीन आयईडी मिळाले होते. यातील दोन त्यांनी नरवालमध्ये वापरले. या भागात तो सातत्याने दहशतवादी कारवाया करत होता.

• राष्ट्रीय

Short URL : https://vrittabharati.in/?p=48252

Related posts