इम्रान खानसह पीटीआयचे ८० नेते नो-फ्लाय लिस्टमध्ये!

Posted by वृत्तभारती Thursday, May 25th, 2023

इस्लामाबाद, (२५ मे) – पाकिस्तानचे माजी पंतप्रधान इम्रान खान यांच्यावर देश सोडून जाण्यास बंदी घालण्यात आली आहे. इम्रानसह पाकिस्तान तहरीक-ए-इन्साफ (पीटीआय) पक्षाच्या ८० सदस्यांचाही नो-फ्लाय लिस्टमध्ये समावेश करण्यात आला आहे. इम्रानची पत्नी बुशरा बीबी हिलाही देश सोडण्यास बंदी घालण्यात आली आहे. इम्रान खान यांनी अनेक प्रांतांमध्ये कलम २४५ लागू करण्याच्या सरकारच्या निर्णयाविरोधात सर्वोच्च न्यायालयात याचिका दाखल केली असून, याला अघोषित मार्शल लॉ म्हटले आहे.
पाकिस्तानच्या राज्यघटनेच्या कलम २४५ अंतर्गत, देशाच्या रक्षणासाठी सैन्य तैनात केले जाते. पंजाब, खैबर पख्तूनख्वा, बलुचिस्तान आणि इस्लामाबादमध्ये कलम २४५ लागू करण्याच्या सरकारच्या निर्णयाविरोधात इम्रानने सर्वोच्च न्यायालयात याचिका दाखल केली आहे.लष्कर कायदा १९५२ अंतर्गत नागरिकांची अटक, तपास आणि खटला घटनाबाह्य आणि बेकायदेशीर असल्याचे इम्रानने याचिकेत म्हटले आहे.पीटीआय सदस्यांवर पक्ष सोडण्यासाठी दबाव आणणे हे घटनेच्या कलम १७ अन्वये घटनाबाह्य आहे. यासोबतच ९ मे रोजी देशात उसळलेल्या हिंसाचाराच्या चौकशीसाठी आयोग स्थापन करण्याची मागणीही त्यांनी केली आहे. वृत्तानुसार, याचिकेत इम्रान खान यांनी पंतप्रधान शहबाज शरीफ, पीएमएन-एन सुप्रीमो नवाझ शरीफ आणि त्यांची मुलगी मरियम नवाज, माजी राष्ट्रपती आसिफ अली झरदारी, परराष्ट्र मंत्री बिलावल भुट्टो झरदारी, जेयूआय-एफ प्रमुख मौलाना फजलुर रहमान आणि इतरांवर आरोप केले आहेत.
पीटीआय नेत्यांचे राजीनामे
पाकिस्तानमध्ये ९ मे रोजी झालेल्या हिंसाचारानंतर इम्रान यांच्या पक्ष पीटीआयच्या सुमारे दोन डझन नेत्यांनी राजीनामा दिला आहे. राजीनामा देणार्‍या नेत्यांमध्ये डॉ. शिरीन मजारी, फैयाझुल हसन चौहान, मलिक अमीन अस्लम, मेहमूद मौलवी, अमीर कयानी, जय प्रकाश, आफताब सिद्दीकी आणि संजय गंगवानी यांचा समावेश आहे. याशिवाय सरदार तन्वीर इलियास, बिलाल गफ्फार, करीम गबोल, मलिक जवाद, बलुचिस्तानचे खनिज मंत्री मुबीन खिलजी, मेजर ताहिर सादिक आणि मुलगी इमान ताहिर, मलिक अमीन अस्लम, सय्यद जुल्फिकार अली शाह यांनीही गेल्या काही दिवसांत राजीनामे दिले आहेत.

• आंतरराष्ट्रीय

Short URL : https://vrittabharati.in/?p=52499

Related posts