उगाच सरकार पडणार, अशी भाषा करू नये

Posted by वृत्तभारती Monday, November 27th, 2023

– राहुल नार्वेकर यांचा संजय राऊतांना टोला,
सिंधुदुर्ग, (२७ नोव्हेंबर) – सरकारने बहुमताचा जादुई आकडा सभागृहात पार केला आहे. सरकार पडायचे असते, तर सभागृहातील संख्याबळावर पडले असते, त्यामुळे उगाच कुणीतरी सरकार पडणार, अशी भाषा करू नये, असा टोला विधानसभेचे अध्यक्ष राहुल नार्वेकरांनी खासदार संजय राऊतांना लगावला. आमदार अपात्रतेबाबत योग्य वेळेत निर्णय घेणार असून, विधानसभेच्या नियमांची पायमल्ली होऊ देणार नाही, असे नार्वेकर यांनी स्पष्ट केले.
सभागृहात अविश्वास ठराव आल्यानंतर संख्याबळ कमी असल्यास सरकार पडते. बाहेर कुणी काहीतरी बोलते म्हणून सरकार पडत नाही. या सरकारने बहुमताचा जादुई आकडा सभागृहात पार केला आहे, असे नार्वेकर म्हणाले. आमदार अपात्रत्रेबाबत वेळेतच निर्णय होणार आहे. सर्वोच्च न्यायालयाने जी कालमर्यादा दिली आहे, त्यानुसार वेळेत निर्णय द्यायचा माझा विचार आहे. कोणत्याही नैसर्गिक न्याय तत्त्वाला धक्का पोहोचणार नाही. विधानसभेच्या नियमांची पायमल्ली होऊ देणार नाही, असे नार्वेकर म्हणाले.
पक्षांतर बंदी कायद्याचे उल्लंघन झाले आहे की नाही, याचा निर्णय आदित्य ठाकरेंनी नव्हे, विधानसभा अध्यक्षांनी घ्यायचा आहे. त्यामुळे उगाच पक्षांतर बंदी कायद्याचे उल्लंघन झाल्याचे वक्तव्य आदित्य ठाकरेंनी करू नये. या कायद्याचे उल्लंघन झाले असेल, तर निश्चितच विधानसभा अध्यक्ष म्हणून मी निर्णय घेईल, असे नार्वेकर म्हणाले.
स्थानिक स्वराज्य लांबणीवर
स्थानिक स्वराज्य निवडणुका लांबणीवर पडल्या आहेत. या संदर्भातील याचिका सर्वोच्च न्यायालयात प्रलंबित आहे. सरकारने या निवडणुका लवकर व्हाव्या, असे सांगितले आहे. परंतु, याचा निकाल न लागल्यामुळे या निवडणुका घेता येत नाही, असे नार्वेकर म्हणाले.

• महाराष्ट्र

• अशी भाषा करू नये
• आदित्य ठाकरे
• उगाच सरकार पडणार
• राहुल नार्वेकर
• विधानसभेचे अध्यक्ष राहुल नार्वेकर
• संजय राऊत
• सरकारने बहुमताचा आकडा सभागृहात पार केला आहे
• सर्वोच्च न्यायालय
• स्थानिक स्वराज्य निवडणुका

Short URL : https://vrittabharati.in/?p=58063

Related posts