उदयनिधी स्टॅलिनच्या विरोधात देशातील २६२ प्रमुख व्यक्तींचे पत्र

Posted by वृत्तभारती Tuesday, September 5th, 2023

नवी दिल्ली, (०५ सप्टेंबर) – तामिळनाडूचे मुख्यमंत्री एमके स्टॅलिन यांचे पुत्र उदयनिधी स्टॅलिन यांच्या अडचणीत वाढ होत आहे. सनातन धर्मावरील त्यांनी केलेल्या टिप्पणीमुळे ते भाजपसह देशातील अनेकांचे लक्ष्य बनले असताना आता देशातील २६२ प्रमुख व्यक्तींनी सर्वोच्च न्यायालयाच्या सरन्यायाधीशांना पत्र लिहून या प्रकरणाची दखल घेण्याची मागणी केली आहे. तामिळनाडूच्या मंत्री उदयनिधी स्टॅलिन यांच्या टिप्पण्यांबाबत भारताच्या सरन्यायाधीशांना लिहिलेल्या पत्राचा विषय असा आहे की, उदयनिधी यांच्या टिप्पणीमुळे सामुदायिक सौहार्द बिघडू शकते. त्यामुळे त्याच्या द्वेषपूर्ण भाषण प्रकरणाची स्वत:हून दखल घेतली जावी. उदयनिधी यांच्या वक्तव्यामुळे सनातन धर्माचे पालन करणारे भारतातील बहुतांश लोक दुखावले आहेत, असे या पत्रात लिहिले आहे. त्या टिप्पणीमुळे भारतातील सामान्य लोकांचे आत्मे आणि हृदय दुखावले गेले आहे. या पत्रावर देशातील सुमारे २६२ प्रमुख व्यक्तींच्या स्वाक्षर्‍या आहेत, ज्यात न्यायव्यवस्था, राजकारण, धर्म, अध्यात्म, संस्कृती, साहित्य, सिनेमा, नोकरशाही, लष्कर आणि उद्योग क्षेत्राशी संबंधित लोकांचा समावेश आहे.
काही दिवसांपूर्वीच तामिळनाडूचे मंत्री उदयनिधी यांनी चेन्नईतील एका कार्यक्रमादरम्यान सांगितले होते की, काही गोष्टी अशा आहेत ज्यांचा केवळ विरोध करून चालणार नाही तर त्या उपटून टाकल्या पाहिजेत. ज्या पद्धतीने डेंग्यू, मलेरिया, कोरोनाचे समूळ उच्चाटन करायचे आहे, त्याचप्रमाणे सनातन धर्मालाही मुळापासून उखडून टाकले पाहिजे. आपण फक्त विरोध करू नये. ते पुढे म्हणाले की, सनातम धर्म महिलांवर बंधने घालतो आणि त्यांना घराबाहेर पडू देत नाही. भारताच्या सरन्यायाधीशांना लिहिलेल्या पत्रात यापूर्वीच्या काही प्रकरणांचाही उल्लेख करण्यात आला होता. त्यावर माजी न्यायमूर्ती श्रीधर राव, माजी न्यायमूर्ती एसएम सोनी, एसएन धिंग्रा, आरके मराठी, आरएस राठौर, एमसी गर्ग, प्रत्युष कुमार, एसएन श्रीवास्तव, करमचंद पुरी, डीके पालीवाल यांच्यासह एकूण २६२ जणांच्या स्वाक्षर्‍या आहेत.

• राष्ट्रीय

Short URL : https://vrittabharati.in/?p=54687

Related posts