पंतप्रधानांनी मध्यरात्रीनंतर केली बनारस रेल्वे स्थानकाची पाहणी

Posted by वृत्तभारती Tuesday, December 14th, 2021

काशी विश्‍वनाथ कॉरिडोरच्या कामांचा घेतला आढावा,
वाराणसी, १४ डिसेंबर – पंतप्रधान नरेंद्र मोदी यांनी सर्व राजशिष्टाचार बाजूला सारून सोमवारी मध्यरात्रीनंतर बनारस रेल्वे स्थानकाची पाहणी केली. यावेळी पंतप्रधान गोडोलिया चौकातही गेले. या भेटीत त्यांच्यासोबत मुख्यमंत्री योगी आदित्यनाथ उपस्थित होते. त्यांनी वाराणसीच्या विकासकामांची पाहणी केली.
पंतप्रधान मोदी यांनी मध्यरात्रीनंतर सव्वा वाजता बनारस रेल्वे स्थानक व काशी विश्‍वनाथ कॉरिडोरची पाहणी केली. त्यांनी ट्विटरवर बनारस रेल्वे स्थानकाचे फोटोही शेअर केले. यात त्यांनी पुढचा थांबा बनारस स्टेशन. रेल्वे कनेक्टिव्हिटी वाढवण्यासह स्वच्छ, आधुनिक आणि प्रवाशांना सोयी-सुविधा देणारी रेल्वे स्थानके सुनिश्‍चित करण्यासाठी काम करीत आहोत, असे म्हटले आहे.
पंतप्रधान मोदी यांनी सोमवारी रात्री मुख्यमंत्री आणि उपमुख्यमंत्र्यांची क्रूझवर भेट घेतल्यानंतर ते बरेका कॅम्पस येथील अतिथीगृहाकडे रवाना झाले. सुंदरपूरमध्ये अचानक ताफा थांबल्यावर ते काशी विश्‍वनाथ धाम येथे गेले.
पंतप्रधानांचा ताफा गोडोलिया चौकात थांबल्यानंतर ते उतरले आणि गोडोलिया-दशाश्‍वमेध रस्त्याचे विकास काम पाहण्यासाठी मुख्यमंत्री योगी यांच्यासह पायी निघाले. रात्रभर गजबजणार्‍या गोडोलिया चौकात अचानक पंतप्रधान आणि मुख्यमंत्र्यांना पाहून लोकांना आश्‍चर्य वाटले. मात्र, कुठेही न थांबता, पंतप्रधान-मुख्यमंत्री एसपीजीच्या सुरक्षेखाली दशाश्‍वमेध घाटावर असलेल्या ज्युपिटर भगवान मंदिरात पोहोचले. विकास प्राधिकरणामार्फत उभारण्यात येत असलेल्या टुरिस्ट प्लाझाची माहिती मुख्यमंत्र्यांनी पंतप्रधानांना दिली. सुमारे २० मिनिटे भ्रमंती करून मोदी व आदित्यनाथ काशी विश्‍वनाथ धामकडे रवाना झाले.

• राज्य

Short URL : https://vrittabharati.in/?p=46802

Related posts